Задолжително носење на заштитни маски во здравствените установи и во домовите за стари лица и забрана на посетите во болниците и во домовите кои згрижуваат стари лица, препорачува Комисијата за заразни болести.
Комисијата денес одржа состанок на кој беше разгледана актуелната состојба на респираторните инфекции во нашата земја, при што било заклучено дека бројката на заболени расте, но сепак не е загрижувачка.
На прес-конференцијата по средбата, претседателот на Комисијата, д-р Александар Петличковски, заедно со директорката на Клиниката за инфективни болести, д-р Милена Стефановиќ споделија информации за заболените со голема кашлица, сезонски грип и ковид-19, како и препораките кои ги донеле.
– Имаме само два случаи на голема кашлица во Македонија, еден инпортиран и еден локален случај. Станува збор за девојка родена 1994 година и шестмесечно дете, кои не се вакцинирани, но се во добра состојба. Во Европа и во регионот се зачестуваат случаите на големата кашлица, па оттука препораката е да зголеми вакцинацијата која во моментов изнесува 83 отсто кои имаат трите дози на вакцината. Со тоа сакаме да ги заштитиме малите деца, бидејќи пертусисот е најопасна болест токму за нив – вели Петличковски.
Тој информираше дека во моментов има зголемување на бројот на заболени со сезонски грип, бидејќи според нив се наоѓаме во сезоната на инфлуенција и повторно треба да се размислува за заштита на најранливите категории на граѓани.
– Ги повикуваме хронично болните доколку во минатиот период не заболеле од грип да дојдат превентивно да примат вакцина која може да ги заштити од потешка форма на ова заболување. Има доволно вакцини во вакциналните пунктови, а и болничките капацитети во моментов не се оптоварени – истакна Петличковски.
Тој додаде дека во моментов бројот на заболени со грип ја надминува онаа бројка на заболени со ковид-19 во земјава, при што се бележи опаѓање на позитивитетот.
Комисијата препорачува задолжително носење на заштитни маски во здравствените установи, домовите кои згрижуваат стари лица, и тоа од страна на персоналот и на згрижените лица и пациентите. Исто така препорачуваме забрана на посетите во болниците и домовите. На останатите граѓани им се препорачува совесно да делуваат, а тоа значи да користат маски кога ќе се почувствуваат болни. Овие лица најдобро е да не се мешаат со други луѓе и неколку денови да се изолираат, како за нивно добро, така и за сите околу нив.
Претседателот на Комисијата Александар Петличковски во изјава за медиумите дадена по седницата на Комисијата рече дека моментално има зголемување на бројот на случаи од грип, но дека во моментот не постои загрозување на општата јавна здравствена состојба.
– По однос на состојбата со грип моментално имаме зголемување на бројот на случаи и споредено со минатата недела и споредено со просечниот број на случаи во минатите 13 години. Влезени сме во сезоната на инфлуенца и повторно треба да размислуваме за заштита на највулнерабилните, на најлесно повредливите луѓе, тоа се постарите луѓе над 65-годишна возраст, луѓето со хронични болести и нив ги повикуваме, доколку во минатиот период не завршиле со вакцинација, да се заштитат со примање на вакцина против грип – рече Петличковски.
Директорката на Инфективната клиника, Милена Стевановиќ информираше дека од почетокот на сезоната починати се шест лица со грип.
– Последниот случај, станува збор за женско лице на околу 45/46 години со коморбидитети. Во моментот, седум лица се хоспитализирани на Инфективната клиника, петмина со потврда, а за две се чека. Шест лица се хоспитализирани со ковид-19 – појасни Стевановиќ.
