Германската полиција во последниве денови се соочи со зголемената кражба на дизел гориво од камиони, поради што ги засили контролите на паркинзите.
Поради драстичното поскапување на горивата, крадците открија нови извори на приходи, а сега, нешто што досега беше ретко, камионџиите се повеќе се жртви на крадците на дизел горивото од нивните резервоари.
– Доаѓаат ноќе и ги отвораат резервоарите на камионите, од каде од едно возило испумпуваат и до 600 литри дизел – изјави полицаецот Марио Пекрул.
– Откако цената на горивото скокна на повеќе од 2,40 евра за литар, кражбите зачестија, вели портпаролот на полицијата во Лудвигслуст – Клаус Вихман.
– Толку кражби на гориво од камиони на паркинзи покрај автопатот не сме имале со години – рече тој.
Повеќе од двојно се зголеми бројот на кражби на гориво од камиони во областа Лудвиглуст -Пархим во првиот квартал од оваа година. Вихман вели дека се краде дизел од камиони и градежни машини.
Поради зголемениот број кражби, полициските патроли почесто ги посетуваат паркинзите, особено ноќе. Полицијата ги советувала камионџиите да не точат гориво пред паузата на паркингот, туку наутро пред да заминат на следното патување. Тоа, велат, важи и за возилата паркирани на паркингот на претпријатието. Според полицијата, украдениот дизел се препродава.
Според автомобилскиот клуб „ADAC“, март бил најскапиот месец на сите времиња во однос на цените на горивото. За една година дизелот скокна од 1,30 на 2,30 евра за литар.
