Најдобрите македонски ракометарки го завршија настапот на Европското првенство чиј кодомаќин е и Скопје со третиот пораз во групната фаза, вечерва од Романија, со 23-31.
За разлика од дуелите со Франција и со Холандија, па и споредено со натпреварите против Романија пред 18 месеци, Македонија беше рамноправен противник во голем дел од 60-те минути. Романките сфатија оти победата и со неа пласманот во втората фаза нема да им биде сервиран на тацна, кога видоа дека црвено-жолтите ракометарки покажуваат и квалитет и карактер и константност.
Мечот овој пат не почна со висока негатива и Македонија имаше можност постојано да врши притисок на Романките, кои сепак, постојано водеа. Отпочеток минимално, некаде до 18. минута, кога беше 8-8. Тогаш настапи првиот застој во македонскиот напад, па Романија направи серија од 3-0. Но, наместо да падне, Македонија ја стегна одбраната, одигра потрпеливо во напад и до крајот на полувремето резултатот го сведовме на 12-13.
Вториот дел, за жал, почна полошо за избраничките на Љубомир Савевски и на првиот гол чекавме дури до 37. минута. Една од главните виновнички за тоа беше голманката, Дачана Хосу, која запиша девет одбрани само во вторите 30 минути. Ѝ помогна на Романија да направи разлика и да се одлепи на 16-12. Таа предност поискусните Романки умееја не само да ја чуваат, туку и да ја надградат до крајот до највисоки плус осум.
Сања Дабевска со седум гола и Симона Маџовска со пет беа најефикасни во нашиот состав, а Кристина Неагу го изрешета нашиот гол со 10 погодоци. Голманката Хосу заврши со 12 одбрани. Романија со два бода го освојува третото место во групата Ц и продолжува во втората фаза, пред Македонија, која остана последна без бодови. За првото место ќе се пресметаат Франција и Холандија, вечерва од 20.30 во „Борис Трајковски“.
