Ирската нискобуџетна авиокомпанија Ryanair планира да приземји неколку летови на својата унгарска линија поради новиот данок на екстра добивка и да се обиде да ја оспори казната што и е наметната за префрлање на трошоците на патниците.
Рајанер ќе ги откаже сите летови на линиите до осум од своите 53 дестинации, а ќе го намали бројот на летови на маршрутите на седум дестинации, изјави во вторник директорот на ирската компанија Мајкл О’Лири.
Данокот на „вишокот на добивка“ на Унгарија на воздухопловниот сектор кој бележи загуби само му наштети на унгарскиот туризам, поврзување, транспорт и работни места, како што беше потврдено со сериозните намалувања на нашиот зимски распоред за Будимпешта, рече О’Лири.
Намалениот број летови на „Рајанер“ е директен одговор на „смешниот“ данок на „прекумерниот профит“, нагласи првиот човек на ирската компанија.
Во јули, унгарската влада воведе данок на дополнителна добивка за компаниите во неколку сектори, вклучувајќи ги енергетскиот, банкарскиот, осигурителниот и телекомуникацискиот сектор. Авиокомпаниите мора да и платат на државата околу 10 евра за секој билет што поаѓа од аеродромите во Унгарија.
Рајанер веднаш ја вклучи оваа сума во цената на билетите и покрај тоа што унгарскиот даночен закон експресно забранува таква практика, па регулаторот изрече казна од 300 милиони форинти.
Ирската компанија најави дека ќе се обиде да ја оспори таа одлука, доколку е потребно, пред судовите на ЕУ, тврдејќи дека Унгарија ги крши европските закони со забраната на таквата практика.
