„Карлес Пуџдемон повеќе не е во Шпанија и никогаш нема да се предаде“.
Ова го изјави неговиот адвокат Гонзало Боје по драматичната летачка посета на Барселона во четвртокот на поранешниот каталонски претседател во бегство, а објави британски Гардијан.
Луис Лах, каталонски пејач и жесток националист, рече дека Пуџдемон е „безбеден и здрав и пред сѐ слободен“, додека, пак, Жорди Турул, генералниот секретар на партијата на Пуџдемон, Заедно за Каталонија, рече дека се вратил дома во Ватерло во Белгија, додавајќи дека пред неговото јавно појавување во четвртокот Пуџдемон пристигнал во Барселона во вторникот вечерта.
Турул тврди дека Пуџдемон имал намера да ѝ се предаде на полицијата во зградата на парламентот, но бил одвратен од „сè поагресивното“ полициско присуство. На крај, според Турул, тој одлучил да не се предаде за да ја поштеди каталонската полиција од срамот да биде фотографиран додека го апсат.
Пуџдемон живее во самонаметнат егзил во Белгија откако избега од Шпанија за да избегне апсење за организирање на нелегален референдум за независност во Каталонија во 2017 година, кога беше претседател на полуавтономниот шпански регион.
Девет членови на неговата влада добија затворски казни до 13 години за нивниот удел во обидот за независност. Сите беа помилувани три години подоцна во 2021 година.
Двајца припадници на каталонската полиција беа уапсени во четвртокот и се соочуваат со обвиненија за помагање во бегството на Пуџдемон.
– Полицајците кои му помогнаа на Пуџдемон да избега не заслужуваат да ја носат униформата – рече комесарот на Мосос д’Ескадра (полицијата), Едуард Салент.
Брзото појавување и исчезнување на Пуџдемон успеа да го украде вниманието на пратеникот на Каталонската социјалистичка партија, Салвадор Ила, кој положи заклетва како претседател во четвртокот.
Додека националната влада одби да ја коментира посетата на Пуџдемон, претпочитајќи да се фокусира на инвестицијата на Ила, опозицијата се обидува да извлече политички капитал од тоа.
Во објава на Х во четвртокот, Алберто Нуњез Феихо, лидер на опозициската Народна партија, повика на оставка на министрите за внатрешни работи и за одбрана поради неуспехот да се уапси Пуџдемон.
„Соочена со таква фарса, владата не може да оди на одмор смеејќи се во лицата на шпанскиот народ“, рече Феихо.
