Пристигна универзалната заштита! Малезиски гинеколог го создаде првиот кондом кој може да го користат и мажи и жени, пренесува Mondo.
Кондомот е направен од материјал кој најчесто се користи за покривање на повреди и рани во болниците. Неговиот изумител се надева дека кондомот, наречен Wondaleaf, ќе ги поттикне луѓето подобро да го контролираат своето здравје, без разлика на нивниот пол или ориентација.
„Тоа е во основа обичен кондом со леплива обвивка“, рече д-р Џон Танг Инг Чинг, лекар во компанијата за медицински помагала Twin Catalyst. „Лепакот се нанесува само на едната страна“, додаде тој, што значи дека може да се преврти и да се користи од двата пола. Секоја кутија содржи два кондоми и ќе чини три евра.
Ќе биде достапен за купување во декември
Просечната цена за десетина кондоми во Малезија е меѓу 4,11 и 8,61 евро. Танг прави кондоми од полиуретан, материјал кој се користи во проѕирните преврски за рани кој е тенок и флексибилен, а сепак цврст и водоотпорен.
„Откако ќе го облечете, често не сфаќате дека е таму“, рече тој, мислејќи на облогите направени од материјалот.
Тој објасни дека Wondaleaf поминал низ неколку рунди на клиничко истражување и тестирање и ќе биде комерцијално достапен преку веб-страницата на компанијата овој декември.
„Врз основа на бројот на клинички испитувања што ги направивме, јас сум прилично оптимист дека со текот на времето тоа ќе биде значаен додаток на многу контрацептивни методи кои се користат за спречување на несакана бременост и сексуално преносливи болести“, рече Танг.
