Светската здравствена организација (СЗО) е вознемирена од првиот потврден случај на колера во Либан по избувнувањето на сегашната криза и соопшти дека итно работи на спречување на поголема епидемија.
Либанските здравствени власти го потврдија првиот случај на колера оваа недела во услови на ескалација на конфликтот меѓу Израел и милицијата Хезболах поддржана од Иран.
Колерата е заразна болест која се карактеризира со дијареа и повраќање и се шири преку контаминација на вода, на пример кога залихите на вода се загадени со измет. Ризикот од појава секогаш постои кога многу луѓе мора да живеат заедно во недоволно хигиенски услови.
Во Либан повеќе од милион луѓе се раселени поради израелските напади во борбата против Хезболах. Многумина живеат во тесни услови во засолништа или на отворено и немаат пристап до чиста вода.
Болест опасна по живот за децата
Колерата избувна во Либан за прв пат по повеќе од 30 години во октомври 2022 година. Регистрирани се повеќе од 8.000 сомнителни случаи на колера, а 23 лица починаа пред крајот на епидемијата во јуни 2023 година. Оваа болест е особено опасна за малите деца.
Тестирање на луѓе и преглед на примерок од вода во моментов се во тек. Во соработка со партнерските организации, СЗО се обидува да обезбеди повеќе чиста вода за пиење и да го подобри отстранувањето на отпадните води. Дополнително, во земјава веќе се донесени медицински материјали за лекување на болни од колера.
Кампањата за вакцинација против колера траеше од почетокот на август, но беше прекината поради ескалацијата на конфликтот меѓу Хезболах и Израел.
