Кралот Чарлс и кралицата Камила вчера покажаа повеќе емоции отколку што е обичај за кралското семејство на јавен собир – кралицата дури и заплака во еден момент.
Камила била преплавена од емоции додека слушала како воен ветеран зборува за ужасот од губењето на својот драг пријател при истоварувањето во Нормандија пред 80 години.
Кралицата била трогната до солзи додека поранешниот припадник на кралската морнарица Ерик Бејтман се присетил на своето искуство на плажата Јута – додека кралот Чарлс исто така изгледал видно трогнат.
Бејтман, кој служел на воениот брод ХМС Еребус, опишал како тој ден можело да се „прешета преку каналот“, бидејќи имало толку многу чамци во инвазијата.
Сеќавајќи се на своите паднати другари, Бејтман рекол дека тој ден „толку многу мажи и жени, меѓу кои и неговиот драг пријател Фред, тргнале со него, но не стигнале до целта“.
Чарлс и Камила им се придружија на принцот од Велс, водечките британски политичари и ветераните на големиот настан во Портсмут, каде кралот го одржа својот прв јавен говор откако му беше дијагностициран рак.
„Приказните за храброст, издржливост и солидарност што ги слушавме денеска и во текот на нашите животи не можат, а да не нè поттикнат, да нè инспирираат и да нè потсетуваат на она што ѝ го должиме на таа голема воена генерација“, рекол кралот, обраќајќи им се на насобраните.
Чарлс, кој добил стоечки овации додека излегувал на сцената придружуван од кралицата Камила, бил одлучен во тоа да присуствува на комеморацијата иако во моментот е во процес на закрепнување од рак.
