Родителите на двегодишната Данка Илиќ која исчезна во Бањско Поле во Србија беа сослушани во текот на истрагата во Вишото јавно обвинителство во Зајечар, а нивните изјави беа вклучени во обвинението против Дејан Драгијевиќ, Срѓан Јанковиќ и таткото на Драгијевиќ, Радослав Драгијевиќ.
Српски „Телеграф“ дошол до обвинителниот акт кој сè уште не е потврден и е предмет на измена, со оглед на тоа што е можно судот да го врати на измена. Мајката на девојчето, Ивана Илиќ, беше сослушана во обвинителството на 17 април, а Телеграф ја објави нејзината изјава.
Таа пред обвинителството рекла дека планира да оди во општината за да поднесе барање за породилно отсуство. Ги повикала свекорот и свекрвата да ги чуваат нејзините две деца.
– Не можам да се сетам дали сум им се јавила тој ден или претходниот ден. Мислам дека им се јавив на телефон. Дојдоа меѓу 9:30 и 10 часот и штом дојдоа се спремив и отидов во општина Бор, од каде што тргнав околу 10:45 часот, после пет до 10 минути си заминаа свекор ми и свекрвата, а јас останав со децата – сведочела Ивана Илиќ.
Таа рекла дека го чистела станот со нејзиниот син, додека Данка за сето тоа време си играла.
– Кога завршив со средување на станот, седнав на подот и си играв со децата. Не знам колку траеше таа игра, на син ми му беше досадно, а кога му е здодевно сака да излезе – додава Ивана.
Таа вели дека го прашала синот дали сака да игра со топка, тој одговорил потврдно, па решила со децата да оди во Бањско Поле.
– Таму живеев како дете во 2013 и 2014 година, додека не почина мајка ми. Целото мое семејство живееше таму, мама, тато, брат ми и јас. Му се јавив на татко ми и го прашав дали е таму, на што тој ми одговори – не, но дека слободно можам да одам таму со моите деца бидејќи е исчистено, а тој сечел гранки и трње.
Мајката на Данка рекла дека заминала за Бањско Поле околу 12:45 или 12:50 часот, дека ги ставила децата во автомобил, дека потоа му се јавила на сопругот и го известила за своите планови.
– Возев до Бањско Поле, излегов од колата, ја отворив капијата, се вратив во колата и отидов зад куќата каде што се наоѓа ливадата. Сето ова беше околу 13:06 или 13:07 часот. Мислев дека децата можат тука да играат .
Таа сведочела дека ги фотографирала децата, „но Данка веќе се упатувала кон патеката што води до тумбата во дворот, која била на пет-шест метри од совозачката врата на автомобилот“.
– Кога ја видов Данка на таа патека, таа беше на метар од почетокот на ридот и на самата патека. Данка оди со трчање, не одеше бавно, а не трчаше ниту брзо. Таа тој ден имаше 22 месеци. Данка го премина ридот и сврте лево кон купот гранки од левата страна на патеката – изјавила Ивана.
Мајката вели дека била на околу метар ипол зад Данка.
– Кога стигна до купот гранки, јас бев зад неа и Данка направи круг околу купот гранки и потоа отиде до колата. Мојот син беше со мене цело време и ја држеше топката.
Ивана изјавила дека децата цело време биле пред автомобилот и дека трчале.
– Седев на циглите додека ги фотографирав, а потоа го ставив мобилниот телефон во џеб и продолжив да ја шутирам топката со син ми, додека Данка цело време трчаше, доаѓаше до нас, ја земаше топката, фрлајќи ја и се смееше.
Ивана вели дека се оддалечила не повеќе од три метри и тоа било пред возилото, каде што биле и децата.
– Игравме околу 10 минути додека син ми не побара вода. Видов дека Данка повторно се качува на ридот и дека е на околу пет метри од автомобилот, односно на самиот почеток на патеката што ја опишав – раскажува таа.
Мајката опишала дека нејзиниот син бил до неа кога отишла да земе вода во автомобилот и дека сè траело околу две минути.
– Кога го кренав погледот кон ридот, видов дека ја нема (Данка). Почнав да ја викам, погледнав низ ливадата каде што си играа, а кога сфатив дека ја нема, го фатив син ми за рака и почнавме да ја бараме по патеката на ридот. Поминавме низ отворена капија, која беше на еден или два метри од ридот – рече таа.
Мајката тврди дека му се јавила на сопругот околу 13 часот и 42 минути и му рекла дека Данка не е таму. Таа го завршила повикот со него и веднаш повикала полиција, се вели во соопштението, по што повторно се движела по споменатата патека.
– Видов паркиран бел автомобил на кој пишуваше „Водовод“. Едниот човек, кој не можам да го опишам, беше на возачкото место, а другиот на левата страна од капијата. Не можам да го опишам ни него бидејќи ми беше свртен со грб. Останав и до две минути и за тоа време човекот се врати во автомобилот и седна на совозачкото седиште, а потоа си заминаа – изјавила мајката на Данка.
Таа рече дека не знае зошто не ги прашала дали ја виделе Данка, дека мислела дека девојчето е во близина и дека ќе дојде, дека е исплашена и дека „не ѝ паднало на памет“ да ги праша.
Кога возилото на „Водовод“ се оддалечило, вели таа, се упатила кон главната капија за да види дали Данка паднала во блиската бара.
– Кога видов дека детето не е во барата, се вратив во дворот со син ми. На враќање го видов соседот. Го видов мојот сопруг како пристигнува со службено возило, тој беше на совозачкото седиште, а возеше неговиот колега. Дојде полициска патрола и почнавме да ја бараме. Разговараа со мојот сопруг, а потоа полицијата побарала засилување. Луѓето почнаа да се собираат и да ја бараат Данка. Дојдоа свекор ми и свекрвата и во периодот од 14:00 до 14:30 часот го оставив син ми кај нив и продолжив да ја барам Данка на блиските ливади, по што се вратив во дворот и разговарав со инспекторите таму – додаде таа.
Додала дека Данка немала навика да ги напушта родителите. Таа рече дека Данка не се плаши од странци.
– Данка покрај мене ја чуваше и мојот сопруг, неговите родители и татко ми, ја чуваше и снаа ми. Немаме непријатели. Не ги познавам осомничените и никогаш не сум ги видела – заклучи таа.
