Кабинетот на американскиот претседател Џо Бајден бара од Европската унија „автоматски“ да ги усогласи стандардите за „увоз“ на метан со американските регулативи за да обезбеди непречено снабдување со американски течен природен гас (LNG), се вели во писмото што го видел Ројтерс.
„Јасно ни е дека за овој процес ќе биде потребно време. Сепак, ние би сакале да започнеме дискусии што е можно поскоро за да обезбедиме континуирано, сигурно и стабилно снабдување со природен гас од САД во Европа“, напишаа американските власти.
САД се најголемиот светски производител на нафта и гас, а нивниот извоз на ЛНГ во Европа нагло скокна откако европските земји решија да ја намалат зависноста од руските енергетски извори поради руската инвазија на Украина.
Метанот е главната состојка на природниот гас и ЛНГ и многу моќен стакленички гас. Повеќе од 150 земји, вклучително и САД и членките на ЕУ, ветија дека ќе ги намалат емисиите на метан за 30 отсто до крајот на деценијата за да ги ублажат климатските промени.
Во мај, членките на ЕУ усвоија закон за ограничување на емисиите на метан во увозот на нафта и гас од 2030 година за да ги поттикнат странските добавувачи да ги намалат своите емисии во производството и транспортот.
ЕУ сè уште не поставила ограничувања ниту разјаснила кога регулативите за метан на другите земји може да се сметаат за „еквивалентни“ на европските.
Во август, десет здруженија со седиште во САД, вклучително и претставници на производители на нафта и гас, изразија загриженост кај претставниците на ЕУ во врска со европските одредби за „увоз“ на метан.
„Увозниците кои нема да ги почитуваат овие обврски би можеле да бидат спречени да ги увезат своите залихи во ЕУ, а со тоа безбедноста на снабдувањето на ЕУ може сериозно да биде загрозена“, пишуваат во писмото од 2 август.
Стандардите на ЕУ и другите земји ќе бараат од американските добавувачи да ги намалат емисиите на метан, дури и ако новиот кабинет ги поништи постоечките регулативи, забележува Џонатан Бенкс, глобален директор за метан во еколошката групација за чист воздух.
