Британскиот министер за одбрана Бен Валас го обвини принцот Хари дека „се фалел дека убил 25 талибански војници додека служел во британската армија во Авганистан и на тој начин ги разочарал своите поранешни колеги“.
Во своите мемоари под наслов „Спер“, принцот Хари го опишал и времето кога бил дел од екипажот на хеликоптерот „Апачи“ во Авганистан, објави Тајмс.
Тој напиша дека „во ерата на апачите и лаптопите, беше лесно да се одреди точно колку непријателски борци убил“.
„И ми се чинеше суштинско да не се плашам од таа бројка, бидејќи мојот број е 25, и тоа не е нешто што ме исполнува со задоволство, но и не ме срами“, рекол Хари.
Во книгата подоцна признал дека ги обезчовечил оние што ги убивал во битка, бидејќи бил „потопен во жештината и конфузијата на битката, па споменатите 25 талибанци не ги мислел како луѓе“.
„Тие беа шаховски фигури отстранети од таблата – лошите момци беа елиминирани пред да можат да ги убијат добрите момци“, изјави Хари.
Од друга страна, британскиот министер за одбрана Валас беше офицер во Шкотската гарда и служеше во Северна Ирска, Германија, Кипар и Централна Америка во текот на 1990-тите.
Тој беше спомнат во депешата за инцидент во Северна Ирска во кој патрола со која командуваше зароби единица на ИРА додека се обидуваше да изврши бомбашки напад врз британските војници.
Кога Валас го прашале колку луѓе убил за време на вооружените сили, тој одговорил: „Тоа би требало да го прашате принцот Хари, бидејќи искрено мислам дека фалењето или зборувањето за бројки го искривува фактот дека војската е тимска игра“, рече Валас.
Досега владата главно се воздржуваше од директни критики на принцот Хари поради неговите мемоари.
