Македонската полиција многу добро виде колку бугарски автомобили скршнаа и завршија во опасната населба, вели за бугарска Нова пријател на 29-годишниот Бугарин кој вчера беше избоден на инцидент во близина на трговскиот центар Чаирчанка пред мечот меѓу Левски и Шкупи.
Петар Бозов, кој инаку е адвокат, тврди дека полицискиот кордон ги напуштил бугарските автомобили кои ги придружувале на автопатот.
– Околу 18 часот бевме на влезот во Скопје. Пред него сите бугарски автомобили беа детално проверени дали има оружје. Излезе кордон да нѐ придружува, но на автопатот нѐ напушти и не бевме добро чувани. Пред кривината, возачот на вториот автомобил ми блесна со светло и застанавме. Ме праша: „Знаеш ли каде одиме? Јас реков „Да, по трасата што ни ја даде Левски“. До нас застана патролно возило и ги прашавме: „Десно“, а тие рекоа: „Да, продолжи, продолжи“. Тоа испадна дека бил патот до излезот за Чаир – вели пријателот на избодениот Бугарин.
Петар се присетува дека околу навивачите се собрала поголема група мажи кои почнале да удираат по предметите. Таму го избоделе и неговиот другар Драго.
– Бевме тепани со метални предмети и лименки – вели Петар.
Тој објасни дека полицијата им забранила да се сликаат. Наводно, им било одбиено и да користат преведувач за време на сослушувањата. На крајот преведувал бугарскиот амбасадор во Македонија.
Според него, избодениот Драго не е во животна опасност. Петар ги повика бугарските власти да помогнат во лекувањето на неговиот пријател и во негово транспортирање во Бугарија.
Петар вели дека ниеден од Бугарите кои патувале кон стадионот не бил организиран да агитира или да предизвикува тепачка.
