Пресудата против Доналд Трамп за фалсификување досиеја за прикривање сексуален скандал останува на сила, пресуди синоќа судијата Хуан Мерчан, отфрлајќи го аргументот на новоизбраниот американски претседател дека неодамнешната одлука на Врховниот суд ја поништила пресудата, јавија американските медиуми.
Адвокатите на Трамп тврдеа дека постоењето на случајот, за време на неговото претседателствување, ќе се меша во неговата способност да владее. Неговата пресуда првично беше закажана за 26 ноември, но Мерчан ја одложи на неодредено време откако Трамп ја победи демократската противкандидатка Камала Харис на изборите на 5 ноември.
Во судската одлука се наведува дека „пресудата за фалсификување деловни документи не претставува ризик за навлегување во авторитетот и во функцијата на извршната власт“.
Адвокатот на Трамп не одговори веднаш на барањето за коментар.
Канцеларијата на окружниот обвинител на Менхетен, Алвин Брег, кој го покрена случајот, рече дека има помали мерки од поништувањето на пресудата на поротата што може да ја ублажи загриженоста на Трамп дека кривичното дело ќе се меша во неговата способност да служи како претседател.
Случајот произлезе од исплата на 130.000 долари од поранешниот адвокат на Трамп, Мајкл Коен, на актерката од филмови за возрасни Сторми Даниелс. Износот ѝ бил платен пред изборите во 2016 година за да не зборува за сексуална средба со Трамп за која рече дека ја имала една деценија порано, што тој го негира.
Поротата на Менхетен во мај го прогласи Трамп за виновен по 34 точки од обвинението за фалсификување деловни книги за да ги прикрие плаќањата. Тоа беше првпат некој американски претседател, поранешен или сегашен, да биде осуден или обвинет за кривично дело.
