Премиерот Димитар Ковачевски денеска го обвини лидерот на ВМРО-ДПМНЕ, Христијан Мицкоски, дека по негова наредба биле правени недолични видеа за неговата малолетна ќерка на социјалната мрежа ТикТок минатата година.
– Има една работа што не сум ја кажал. Директно по негова наредба, за мојата малолетна ќерка, во текот на јули минатата година, кога се носеше францускиот предлог, беа правени недолични видеа на ТикТок и јас за ова од таков нечовек не барам извинување – рече премиерот.
Ковачевски обвини дека тој неговото семејство се под директен напад, а посебно неговата сопруга, по директна наредба на Мицкоски.
– До таква атмосфера дојде бидејќи ВМРО-ДПМНЕ, немајќи никакви аргументи во расправата во Собранието за реконструкцијата на Владата и со оглед на тоа дека нивниот претседател кажуваше дека имал 61 пратеник за да ја турне Владата, а излезе дека Владата има зголемено мнозинство од 65, па по негова наредба дискусиите на пратениците од ВМРО-ДПМНЕ беа исклучиво насочени против мојата сопруга, иако тој знае за одредени здравствени предизвици кои мојата сопруга ги имаше и ги има – објасни Ковачевски.
Премиерот одговари и на новинарско прашање дали ѝ се извинил уште еднаш на пратеничката Бети Стаменковска – Трајковска од ВМРО-ДПМНЕ, за навреда наводно искажана на седница во Собранието.
– Во Собранието се дискутираше 11 дена. Тоа што го кажав, потоа го кажав и од говорница, но секако дека може различно да биде протолкувано. Сепак, бидејќи пратеничката исклучително ја почитувам, а кажала дека е навредена, јас лично ѝ се јавив и кажав дека ако е навредена од тоа што разбрала дека сум го кажал д,ека ѝ се извинувам. И на претседателката на Форумот на жени на ВМРО-ДПМНЕ ѝ го кажав истото – рече премиерот.
