Премиерот Димитар Ковачевски денеска се сретна со украинскиот претседател Володимир Зеленски, на маргините на вториот Самит на Европската политичка заедница во молдавскиот главен град Кишињев.
На средбата, Ковачевски истакна дека Македонија ја осудува бруталната воена агресија што Русија ја врши врз независна и суверена Украина и ја поддржува евроатланската интеграција на земјата и посветеноста на политиката на отворени врати на НАТО.
– Го подржуваме суверенитетот и територијалниот интегритет на Украина и нејзиното право да го трасира самостојно својот пат. Обезбедивме и ќе продолжиме да обезбедуваме поддршка во секоја форма која и е потребна на Украина, истакна Ковачевски.
Тој потсети дека Македонија е дел од основачката група за формирање на Посебен меѓународен суд за кривичните дела од агресијата, со што и овој пат јасно се позициониравме на вистинската страна на историјата.
Зеленски се заблагодари за поддршката што украинскиот народ ја добива од Македонија во клучни моменти
– Не правевте калкулации, бевте покрај нас од првиот ден и украинскиот народ и ние го цениме тоа, истакна украинскиот претседател.
