Во Младинскиот културен центар во Скопје денеска ќе се одржи премиерната изведба на театарската претстава „Глад“, во режија на Хана Миленковска и во продукција на Атриум.
Авторскиот тим, состоен од режисерката Хана Миленковска, драматургот Калија Киселички и од композиторот Ади Имери, како што стои во соопштението, ја поставува драмата што се занимава со ненаситноста и со гладот, од емоционална и од физичка гледна точка. Делото се стреми да посочи дека циклусот на гладот не е изолиран, туку дека всушност претставува една вечна борба на човекот и на колективите.
Актерите Лео Поповиќ, Дениз Ајдаревиќ, Марко Младеновиќ, Филип Миленкоски и Димитар Паскоски ќе претстават микрокосмос од сложени човечки емоции и односи, во мноштво од контексти, кои на драмско-музички основ ќе ги доближат позициите на (над)моќ, страдание, заедништво и на борбена истрајност во еден свет во кој малкумина уживаат во изобилието, додека пак, гладот непрестајно владее.
Проектот е поддржан од Министерството за култура и туризам на Република Северна Македонија и од ЕВН.
