Белгискиот премиер Александар Де Кро во понеделникот изрази не премногу оптимистичка прогноза за Европа по енергетската криза.
„Следните пет до десет зими ќе бидат тешки“, рече Де Кро во понеделникот на настан во Белгија, пренесува Business Insider.
„Многу сектори се борат со високите цени на енергијата. Внимателно го следиме, но мораме да бидеме транспарентни – наредните месеци ќе бидат тешки, претстојните зими ќе бидат тешки“, рече тој.
Коментарите на белгискиот премиер дојдоа во време кога Европа се соочува со енергетска криза што се влоши со руската инвазија на Украина. Континентот е зависен од рускиот гас, а од таа земја увезува 40 отсто од потребите. Сепак, Русија го забави протокот на гас преку клучниот гасовод Северен тек 1 до 20 отсто од својот капацитет, наведувајќи дека тоа е од технички причини, односно поради одржување.
Европските претставници, пак, велат дека овој потег е одмазда за санкциите поради инвазијата на Украина.
Белгија увезува само 6,5 отсто од својот гас од Русија, пишува The Brussels Times, повикувајќи се на официјални податоци. Но, сметките за енергија во таа земја продолжуваат да растат, бидејќи цените на светскиот пазар пораснаа. Во понеделникот, референтните цени на холандскиот гас скокнаа за речиси 20% за еден ден на ново рекордно високо ниво по веста за непланираното тридневно исклучување на гасоводот Северен тек 1, почнувајќи од 31 август.
Зголемените цени на енергијата ги притиснаа големопродажните цени на електричната енергија во Белгија на ново рекордно високо ниво во неделата, пишува The Brussels Times. Ова резултира со рекордно високи сметки за енергија за домаќинствата.
И другите земји во Европа очекуваат сметките за енергија да продолжат да растат. Во Обединетото Кралство, сметките за електрична енергија во домаќинствата се очекува да бидат четири пати повисоки на почетокот на 2023 година отколку меѓу 2018 и 2021 година, според Фајненшл тајмс.
Во Германија, сметките за електрична енергија во домаќинствата веројатно ќе се удвојат бидејќи компаниите ги префрлаат зголемените трошоци за природен гас, објави АФП на почетокот на август, цитирајќи снабдувач со електрична енергија.
