Еден супермаркет во Нов Зеланд ја тестира употребата на вештачка интелигенција за да создаде евтино домашно мени. Сепак, беше забележано дека апликацијата предлага некои необични јадења – им препорачува на клиентите рецепти со употреба на смртоносен гас хлор, проследено со сендвичи со „отровен леб“ и печени компири кои ги одбиваат комарците.
Апликацијата која ја креираше синџирот супермаркети „Пак н’ Саве“ беше рекламирана како начин на клиентите, во време на криза и период на зголемени животни трошоци, креативно да ги искористат работите што им останале, пренесува РТС.
Од корисниците се бара да внесат различни производи што ги имаат во своите домови во апликацијата и тие автоматски ќе добијат план или рецепт за оброци, придружени со весели коментари.
Првично, апликацијата привлече внимание на социјалните мрежи за некои непривлечни рецепти, вклучувајќи го и „Oreo Veggie Paprika“ (Oreos се познато колаче).
Меѓутоа, кога клиентите почнаа да експериментираат со внесување на поширок спектар на артикли на списоците за купување во домаќинството, апликацијата почна да дава уште помалку привлечни препораки.
Еден рецепт кој беше наречен „мешавина на ароматична вода“ ќе резултира со гас хлор, меѓу другото. Бот го препорачува рецептот како „совршен безалкохолен пијалок кој ќе ја задоволи вашата жед и ќе ги освежи вашите сетила“.
„Послужете разладено и уживајте во освежителната арома“, се наведува во апликацијата, но не се споменува дека вдишувањето на гасот хлор може да предизвика оштетување на белите дробови или смрт. Новозеландскиот политички коментатор Лиам Хер го објави „рецептот“ на Твитер, ги охрабри другите Новозеланѓани да експериментираат и да ги споделат своите резултати на социјалните мрежи.
Меѓу препораките беа коктел со белило „свеж здив“, сендвичи со отров од мравки и лепак, изненадување од белило ориз и „метанол блаженство“ – вид на пржена храна со вкус на терпентин.
Претставник на супермаркетот за медиумите изјави дека се разочарани што „мал број корисници се обиделе да ја користат апликацијата на несоодветен начин, а не за намената“.
Во соопштението се вели дека супермаркетот „ќе продолжи да го подобрува“ ботот за да го направи безбедна и корисна апликација и се истакнува дека апликацијата укажува дека корисниците треба да имаат над 18 години.
Во предупредувањето приложено до „планерот за оброци“ се наведува дека рецептите „не се потврдени од човечко суштество“ и дека компанијата не гарантира „дека кој било рецепт ќе биде целосен или избалансиран оброк или погоден за консумирање“.
„Морате да го искористите сопственото проценување пред да направите било каков рецепт произведен од Savey Meal-bot“, се вели во соопштението на супермаркетот.
