Градоначалничката на Париз, Ан Идалго, конечно го исполни ветувањето и утрово се капеше во Сена.
Облечена во костум за нуркање, Идалго се нурна во реката во близина на Градското собрание, нејзината канцеларија и катедралата Нотр Дам.
Таа беше придружувана од претседателот на Организацискиот комитет на Олимписките игри, Тони Естангена.
– Ова е среќа. За ова сонувавме со години. Работевме многу, многу напорно, водата е многу добра, малку студена, но не толку многу – рече градиначалничката на Париз, додавајќи дека реката е доволно чиста за да биде домаќин на натпреварите во далечинско пливање за време на Олимписките игри и на церемонијата на отворање за 9 дена, објави „Паризиен“.
Нејзиниот потег е дел од напорите да покаже дека чистотата на Сена е подобрена пред Летните игри, кои ќе започнат на 26 јули со раскошна церемонија на отворено, која вклучува и парада на спортисти на чамци на Сена.
Од 2015 година, организаторите инвестираа околу 1,5 милијарди долари, за да ја подготват Сена за Олимпијадата и да обезбедат парижаните да имаат почиста река во годините по Игрите.
Планот вклучуваше изградба на огромен подземен базен за складирање на вода во центарот на Париз, реновирање на канализационата инфраструктура и надградба на пречистителната станица за отпадни води.
И покрај постојаните ветувања на политичарите, пливањето во Сена е забрането повеќе од еден век.
Жак Ширак, поранешниот претседател на Франција, даде слично ветување во 1988 година кога беше градоначалник на Париз, но тоа никогаш не беше исполнето.
Ширак, кој во тоа време водеше кампања за трет мандат, вети дека ќе ја исчисти реката таа година како дел од неговата програма „Чиста Сена“.
Тој тогаш сметаше на период од 5 години за чистење на реката, не ни помислувајќи дека всушност ќе бидат потребни 36 години за да се спроведе.
Идалго тргна по стапките на француската министерка за спорт, Амелија Оудо-Кастер, која во саботата пливаше во Сена во нуркачко одело.
Сена ќе биде домаќин на неколку пливачки настани на отворени води за време на игрите, вклучително и олимпиското маратонско пливање и пливачките етапи на олимпискиот и параолимпискиот триатлон.
