Сергеј Трифуновиќ, познатиот српски актер, имаше порака за најдобриот тенисер на светот Новак Ѓоковиќ, кој многумина очекуваат да проговори за актуелните случувања во Србија.
По трагедијата во Нови Сад, во која животот го загубија 15 лица, а уште двајца се борат за живот, протести беа организирани низ Србија, а студентите и учениците со денови ја блокираат работата на факултетите и на многу училишта.
Во оваа прилика барем досега се огласија само мал број српски спортисти, а меѓу нив го нема Новак Ѓоковиќ, што на многумина им „боде очи“.
Трифуновиќ на социјалната мрежа „Х“ го сподели текстот на Нова.рс за тоа како Ѓоковиќ планира да игра двојки со Ник Киргиос во Бризбејн, а неговиот опис привлече внимание.
„Мислев дека тој ја поддржува борбата на својот народ против тиранијата. Но, играше двојки“, напиша актерот и практично го прозва Ѓоковиќ.
Трифуновиќ пред неколку дена ги критикуваше и српските спортисти кои за разлика од спортистките молчат.
Неодамна Ѓоковиќ во интервју „објасни“ зошто ретко зборува за политичките случувања во земјава. Но, она што во моментов се случува во Србија не е само политичко, туку и социјално прашање.
„Јас лично одлучувам за тоа (дали ќе се изјаснам). Ги имам најблиските луѓе во мојот живот, од семејството до советниците до професионалните луѓе околу мене. Секако дека барам мислење, но јас сум тој што одлучува. Доволно сум зрел, старец, за да можам да проценам некои работи како треба да се прават работите. Веќе зборував за некои општествени прашања, како што е ова (ископ на литиум), пред неколку години и така натаму. Некогаш го чувствувам, некогаш не. Некогаш проценувам дека треба да се ангажирам, некогаш не. Имам свои причини, бидејќи на тоа гледам широко.
Дека не треба да биде само импулсивно, од некаков хир во моментот, бидејќи што и да ми се случи во животот од таа емоција, не испадна добро. Така им испадна на нашиот народ“, изјави Новак Ѓоковиќ во емисијата „Вечер со Иван Ивановиќ“.
