Пандемијата на Ковид-19 во голема мера ја забави борбата против сиромаштијата кај најмладите, а 333 милиони деца сè уште живеат во услови на екстремна сиромаштија, се вели во извештајот на УНИЦЕФ и Светската банка.
Агенцијата на ОН предупредува дека секое шесто дете во светот живее со помалку од 2,15 долари на ден и наведува дека 30 милиони деца би излегле од сиромаштија да не била пандемијата.
„Тешките кризи како резултат на Ковид-19, војните, климатските промени и економските шокови го запреа напредокот и оставија милиони деца во екстремна сиромаштија“, рече генералната директорка на УНИЦЕФ Кетрин Расел.
„Светот во кој 333 милиони деца живеат во екстремна сиромаштија, лишени не само од најосновните потреби, туку и од достоинството, животните можности и надежта, е едноставно неприфатлив“, додаде таа.
Екстремната сиромаштија погодува дури 40 отсто од децата во субсахарска Африка.
Иако другите области во светот забележаа пад на детската сиромаштија во последниве години, субсахарска Африка забележа голем пораст, првенствено поради галопирачкиот демографски раст, пандемиите и катастрофите предизвикани од климатските промени.
Луис Фелипе Лопез-Калва, директор за сиромаштија и еднаквост на Светска банка, рече дека овие деца не треба да се напуштат.
„Завршувањето на детската сиромаштија е политички избор“, рече Лопез-Калва.
