Австрија најави дека во борбата против инфлацијата ќе ја засили контролата на малопродажните компании и наплатата на данокот на екстра добивка во енергетскиот сектор.
Компаниите од прехранбениот сектор, во кој доминираат синџирите супермаркети Rewe, Aldi, Lidl и Spar, во иднина ќе треба да ги објавуваат трошоците за набавка на основните прехранбени производи.
Владата ќе го заостри оданочувањето на дополнителната добивка во енергетскиот сектор доколку компаниите доброволно не ги намалат цените, најави во средата канцеларот Карл Нехамер.
Според проценките на европската статистичка служба Еуростат, инфлацијата во Австрија во април изнесувала 9,6 отсто и е значително над просекот на еврозоната, каде што потрошувачките цени се за седум отсто повисоки во однос на истиот период лани.
Корпорациите направија „милијарди профити на сметка на граѓаните и економијата“, рече канцеларот Нехамер. „Не треба да го трпиме ова“, додаде вицеканцеларот Вернер Коглер од партијата на Зелените.
Собранието во јуни треба да ги усвои измените на соодветните закони.
Опозициските социјалдемократи ги критикуваа плановите на владата.
„Оваа прес-конференција нема да намали ниту една цена“, рече Јорг Лајхтфрид, заменик-претседател на парламентарната група на Социјалдемократите (СЈОЕ). Тој вината за последното поскапување ја препишува на владејачката коалиција, истакнувајќи дека ризикот од сиромаштија е значително зголемен.
СЈОЕ на вонредната седница на Собранието в петок ќе поднесе барање за изгласување недоверба на Владата и ќе побара суспендирање на ДДВ за основните прехранбени производи и блокирање на поскапувањата на кириите, кои неодамна скокнаа за околу 10 проценти.
