Полицијата во Романија води истрага и приведува лекари кои се осомничени дека со години на пациенти им вградувале пејсмејкери извадени од телата на починатите и сите ги наплаќаат како да се нови пејсмејкери.
Според неофицијални информации извршени се повеќе од 170 интервенции, а досега е приведен најмалку еден лекар.
Властите соопштија дека се извршени најмалку 24 претреси во неколку окрузи во рамки на истрагата за злоупотреба на службената положба, поткуп, употреба на фалсификат, измама…
– Постои основано сомнение за сторени повеќе кривични дела поткуп и фалсификување, извршени од медицински лица или лица од нивната околина, како и индиции дека овие медицински лица извршиле повеќе хируршки интервенции, кршејќи ги работните процедури. Постојат индиции дека се користеле кардиомедицински помагала (пејсмејкери и дефибрилатори), кои го загрозувале физичкиот интегритет, здравјето или животот на луѓето, нивните пациенти – изјави извор од истрагата.
Како што информираат од полицијата, по извршените претреси, на повеќе локации биле пронајдени поголема сума пари и вредни уметнички предмети, за кои се претпоставува дека биле земени како поткуп.
– Откриени се 162.920 леи, 116.795 евра, 2.357 американски долари, 900 фунти, 300 швајцарски франци, 3.500 форинти, 520 шведски круни, 200 дански круни, 3 мобилни телефони, 160 таблети и 250 дискови и 25 пејсмејкери/дефибрилатори – се наведува во соопштението.
Извор од истрагата за романските медиуми изјавил дека се пронајдени и 36 слики на реномирани национални сликари, кои биле депонирани во комплексот на Националниот музеј на Молдавија во Јаши.
Засега е потврдено апсењето на медицински работник во Јаши и му е одреден притвор до 24 часа.
Обвинителството соопшти дека се распишани девет потерници.
Една од наредбите се однесува на доктор Д.Т., поранешен шеф на кардиолошката служба во болницата „Свети Спиридон“.
– Осомничениот е обвинет дека вградил повеќе од 238 уреди извадени од трупови или од непознато потекло помеѓу 2017 и август 2022 година, непочитувајќи го ризикот од предизвикување сериозни здравствени проблеми или дури и смрт на пациентите со нивна повторна употреба, иако тоа е „забрането со примарната легислатива“. Воедно, производителите на медицински помагала на пакувањето на апаратите забележуваат забрана за нивна повторна употреба – соопшти обвинителството.
