Европската комисија предложи нови санкции против Русија поради војната во Украина, со воведување забрана за руските дијаманти и заострување на другите мерки, како што се ограничувањата на цената на нафтата, според документите што ги видел ПОЛИТИКО.
Од почетокот на руската сеопфатна инвазија на Украина, Брисел усвои 11 пакети санкции против Москва – кои опфаќаат сè, од енергија до банкарство – во обид да го испразни воениот ковчег на претседателот Владимир Путин. Последните пакети санкции беа повеќе фокусирани на мерките за справување со заобиколувањето на санкциите, бидејќи другите мерки се или политички чувствителни или може да и наштетат на Европската унија повеќе отколку на Русија, потсетува ПОЛИТИКО.
Сржта на овој предлог, кој допрва треба да го потпишат земјите-членки на ЕУ, е забраната за руските дијаманти.
Вашингтон веќе ги забрани руските дијаманти, но ЕУ сè уште не – во голем дел поради обидите на Белгија да ја заштити трговијата со дијаманти во Антверпен.
Забраната ќе се применува од јануари 2024 година, но ќе има постепено воведување на индиректна забрана за увоз на дијаманти обработени во Русија во земји кои не се членки на ЕУ, бидејќи треба да се направи повеќе техничка работа за да се воспостави механизам за потекло на ниво на Г7.
Нацрт-предлогот ќе воведе и построги барања за да се спречи руската нафта купена со кршење на постоечките санкции да се препродава со фалсификувани фактури.
„Механизмот за ограничување на цените се потпира на процес на атестирање кој им овозможува на операторите во офшор рускиот синџир на снабдување со нафта да покажат дека е купена по повисока или пониска цена“, се вели во извештајот, тврдејќи дека „соодветно е да се воведе услов дека сертификатите вклучува и детални дополнителни трошоци, како што се осигурување и транспорт“.
Според сегашните правила, бродските компании и нивните осигурителни компании мора да се изјаснат дека не платиле повеќе од 60 долари за барел за нивниот товар, но долго време постои загриженост дека трговците нудат големи дополнителни суми за да го осигураат својот товар и тврдат дека навистина платиле разни трошоци како што е превозот. Предложените измени би го отежнале тоа, но сè уште е нејасно дали ќе има доволно надзор за да се спречи сомнителните договори да се реализираат.
Амбасадорите на ЕУ првпат треба да разговараат за пакетот во петок, потврдија двајца дипломати за ПОЛИТИКО, но останува нејасно кога ќе дадат зелено светло.
