Легендарната американска кантри пејачка Лорета Лин почина на 90-годишна возраст. Нејзиното семејство ја потврди веста во изјава за АП.
„Нашата сакана мајка, Лорета Лин, почина мирно во сон утрово, на 4-ти октомври во нејзиниот дом на нејзиниот сакан ранч во Хјурикен Милс“, напиша семејството, барајќи приватност во овој тежок период на тага и нагласија дека детали за комеморацијата и погребот ќе бидат објавени подоцна.
Пејачката на хитот „You Ain’t Woman Enough“ беше хоспитализирана поради мозочен удар во мај 2017 година и ја откажа својата турнеја и објавувањето на албумот.
Таа се врати во центарот на вниманието минатиот октомври кога зборуваше на настан кој го слави приемот на нејзиниот пријател Алан Џексон во Куќата на славните на кантри музиката. Лин изгледаше слабо кога излезе на сцената со поддршка и рече дека Џексон е единствената личност што може да ја натера да ја напушти куќата.
Во јануари 2018 година, падна и го скрши колкот во нејзиниот дом во Тенеси, што ја поттикна нејзината сестра, пејачката Кристал Гејл, да ги замоли обожавателите за „љубов и молитви“.
Лин, родена како Лорета Веб во Бачер Холоу, Кентаки, беше најнаградуваната жена-кантри изведувачка, продавајќи повеќе од 45 милиони албуми ширум светот.
Лорета и нејзиниот сопруг, наречен Ду, имаа шест деца и беа во брак 48 години до неговата смрт во 1996 година. Пејачката подоцна во својата автобиографија од 2002 година, „Still Woman Enough“, откри дека нејзиниот сопруг ја изневерувал и дека имале бурна врска.
ФОТО: Јутјуб
