Боро Јовановиќ, поранешен финалист на Вимблдон во пар со Никола Пилиќ и еден од најуспешните хрватски тенисери во историјата, почина на 85-годишна возраст.
Веста за смртта на Јовановиќ ја соопшти Хрватскиот тениски сојуз, чија изјава ја пренесуваме.
„Еден од најдобрите хрватски тенисери на сите времиња, Боро Јовановиќ, повеќе не е меѓу нас. Почина на 85-годишна возраст, откако остави неизбришлива трага на хрватскиот и светскиот тенис. Минатата година ја доби наградата за животно дело во тенис од Хрватскиот тениски сојуз, како признание за неговиот огромен придонес во спортот и постигнатите резултати. Со Никола Пилиќ беше финалист на Вимблдон во пар во 1962 година, а во два наврати (еднаш со Пилиќ, еднаш самостојно) беше прогласен за најдобар спортист на Југославија во традиционалниот избор на Спортски вести.
Освои злато и на Медитеранските игри во двојка со Пилиќ и бронза во сингл, а во професионалната ера имаше неколку забележителни резултати на некои од најголемите турнири, кои денес можат да се споредат со натпреварувања од серијата АТП Мастерс 1000.
Роден е во Загреб на 21 октомври 1939 година, а по завршувањето на играчката кариера во 1974 година бил и тениски тренер. Во 2016 година, Меѓународната тениска федерација (ИТФ) го награди за неговиот посебен придонес во Дејвис купот. Датумот на последното збогување ќе биде објавен подоцна, а изразуваме длабоко сочувство до семејството на Бора Јовановиќ“, соопштија од Хрватската тениска федерација.
