Пејачката Џејн Марцевски позната под уметничко име „Nightbirde“ почина на 31-годишна возраст по борба со ракот. Таа со својата насмевка и позитивен став кон животот и покрај тешката борба со ракот на белите дробови, ‘рбетот и црниот дроб гоосвои жирито и гледачите на шоуто „Америка има талент“.
Џејн ги освои симпатиите ширум светот со изведбата на својата песна „It’s OK“ во јуни минатата година и раскажа за својата борба со ракот. Таа ги воодушеви членовите на жирито и публиката и заслужено го доби „златното копче“ од Сајмон. Набрзо по настапот Џејн мораше да се повлече од сцената поради влошување на здравствената состојба, но ниту во еден момент не ја изгуби надежта дека повторно ќе има можност да пее пред своите фанови.
„Споделувањето на моето срце со светот беше чест и остварување на сонот. Какво чудо што болката низ која поминав се претвори во убавина што ги тера луѓето ширум светот да ги отворат очите широко. По аудицијата, моето здравје се влоши и борбата против ракот ја бара сета моја енергија и внимание. Жал ми е што нема да можам да продолжам да бидам дел од оваа сезона AGT. Животот не секогаш е полезен за тие кои го заслужуваат тоа, но веќе го знаеме тоа“,напиша Џејн во обраќањето кон своите фанови кога мораше да прекине со натпреварувањето.
Во 2017 година на Џејн ѝ бил дијагностициран рак на дојката. Две години подоцна докторот ѝ дал само 2 проценти шанси за живот во период од три до шест месеци.
