Во реакцијата за состојбите во Македонија, Горан Илијевски, претседателот на Партијата на Македонците во Србија по последните случувања во Македонија со посетата на Тетово и Чаир на косовскиот премиер Аљбин Курти, бара од Македонија да ја преиспита одлуката за признавање на Косово.
Тој вели дека одлуката е донесена спротивно на волјата на народот и бара распишување на референдум за ова прашање, пренесува порталот мкд.мк.
– Го признавте Косово иако од Косово имаше класичен упад на КЗК корпус и напад на воен конвој на АРМ од страна на косовските сили. Има споменици за амнестираните терористи, дел од нив станаа државни функционери, како на пример претседателот на Собранието, кого и денес го нарекуваат команданте. А за загинатите припадници на АРМ нема решен статус и обележјата (не споменици) постојано се кршат. Во која држава во светот го има тоа, терористи (УЧК е прогласена за терористичка организација) сега да управуваат со државни институции? Поголема штета прават денеска што ги уриваат институциите како продолжение на 2001 година – вели Илијевски.
Тој се осврнува и на другите случувања во Македонија.
– Зошто неуставно се укинати три пратенички места од дијаспората, од најголемата изборна единица 7. До кога во борбата за власт македонските најголеми партии ќе прават антидржавни отстапки и непринципиелни коалиции со албански партии? – рече Илијевски.
Тој запраша кој ја води надворешната политика на Македонија со застапување на интересите на Косово и барање на другите држави да го признаат.
– Имаме ли државна национална стратегија или само уценета партиска политика заради формирање на власта. Што прави Агенцијата за национална безбедност кога по државата се шетаат поединци со странски знамиња – бугарски, знамиња на голема Албанија… работат ли нешто за националната безбедност? Кој ја води и чија е Македонија? До кога мислите дека може вака? – прашува претседателот на Партијата на Македонците во Србија.
Тој констатираше дека Македонија тоне, а македонските партии освен што се препукуваат и навредуваат ништо конкретно не преземаат, не сте свесни дека ја губите државноста, суверенитетот и интегритетот.
– Дали државна стратегија е на Македонците од дијаспората да не им се даваат македонски државјанства, а ДУИ се фали дека доделиле 12.000 државјанства (изјава на државен функционер). Еден Македонец од Србија веќе трета година чека на македонско државјанство, со комплет документација… Толку ли чекаат и криминалците кои добиваа македонско државјанство? Доста беше, разбудете се, не ја уништувајте државата, вие не ја направивте, за неа гинеа многу пред вас, за вие денес да ја распродавате – вели Илијевски во обраќањето до јавноста.
