„Додека стоиме на прагот на новата година, важно е да размислиме за патувањето низ 2024 година — година што започна со историскиот избор на првиот премиер Албанец во Република Северна Македонија, момент што ги исполни срцата на сите Албанци со гордост“.
Ова се вели во соопштението на ДУИ, во кое партијата ја честита Новата година.
„Оваа победа не беше само политичка; тоа беше победа на каузата дека Албанците се рамноправни членови на оваа држава која е нашата заедничка татковина. За првпат, Албанците ја почувствуваа ветената визија за вистинска мултиетничка демократија каде што правата и еднаквите можности не се само идеали, туку и реалност. Меѓутоа, низ годината сведочевме длабок и загрижувачки контраст — целосен пресврт“, се наведува во соопштението на ДУИ во кое партијата ја честита новата 2025 година.
Она што започна како чекор напред, се посочува во соопштението, се претвори во година на пречки за Албанците.
„Политичкиот пејзаж беше трансформиран од нелегитимна коалиција што го исклучи вистинското албанско претставување, сведувајќи го нашиот глас во Владата на неколку избрани пријатели на премиерот. Правото на самоидентификација беше нападнато и оспорено од Уставниот суд, предизвикувајќи едно од основните човекови права на нашиот народ. Албанскиот јазик, темелот на нашиот идентитет, беше омаловажен. Европскиот сон се оневозможи“, се додава во соопштението.
Механизмите за правична застапеност, зацртани од Рамковниот договор, беа демонтирани, се потенцира во соопштението.
„Албанското знаме, нашиот симбол на гордост, беше понижено, додека актите на потценување беа славени. Нашата национална азбука, која ги обединува сите Албанци, беше забранета, нанесувајќи удар во срцето на нашиот идентитет и национално образование. Ова е реалноста на 2024 година: година што започна со надеж и заврши со намерни обиди да се поништи напредокот што Албанците со децении се бореа да го постигнат. Сепак, пред овие предизвици, ние остануваме непоколебливи. Ниту еден напад врз нашиот идентитет, јазик или права не може да го замати духот на албанскиот народ. Овие пречки само ја засилуваат нашата решеност да се бориме за еднаквост, правда и за напредок. Ние сме чуварите на нашето наследство и архитекти на нашата иднина“, се додава во соопштението на партијата.
Додека ѝ кажуваме збогум на оваа бурна година, се истакнува во соопштението, гледаме напред кон 2025 година со нова решителност.
„ДУИ останува посветена на заштитата на правата на Албанците, на унапредување на мултиетничката демократија и на неуморно работење за да порасне секое дете во Северна Македонија во општество каде што неговите соништа не се ограничени од етничката припадност. Нека новата година биде година на надеж, единство и на успех за секое семејство. Заедно ќе ги надминеме сите предизвици и ќе изградиме иднина што ги почитува жртвите на нашите предци и ги исполнува аспирациите на генерациите што доаѓаат. Среќна Нова Година 2025!“, се додава во соопштението на партијата.
