Прошетката на гордоста денеска се одржува во Белград под слоганот „Не сме ни блиску“, со што организаторите велат дека има многу проблеми кои треба да се решат. Aктивистите нагласуваат дека ЛГБТ+ заедницата во Србија се соочува со зголемено насилство и дискриминација.
И овогодинешниот Прајд го обезбедуваат силни полициски сили, а голем број познати уметници беа дел од прошетката низ централните улици на Белград.
Организаторите пред Владата најавија дека Законот за истополови бракови е „под клуч“ во таа институција. Овој закон е главно барање на ЛГБТИ+ заедницата во Србија веќе 6 години. Заедницата бара и Закон за родов идентитет и правата на интерсексуалните лица, како и подобрување на здравствените услуги за транс лицата.
Парадата на гордоста ја поддржа и амбасадорот на Соединетите Американски Држави (САД) во Србија, Кристофер Хил.
„Важно е сите да сме тука заедно и секој да има право да оди каде сака“, рече Хил.
Тој исто така истакна дека е важно да се постигне напредок во остварувањето на правата на ЛГБТ+ заедницата.
