Папата Франциско во четвртокот ги повика земјите да управуваат со мигрантските бранови најдобро што можат и да ги прошират каналите за нивно безбедно и редовно движење, во време кога САД се соочуваат со голем бран мигранти на својата јужна граница.
Ова Папата го истакна во пораката по повод Светскиот ден на мигрантите и бегалците, кој годинава се одбележува под слоганот „Слободен избор за миграција или престој“.
Папата повика на „заедничка посветеност“ на управувањето со миграцијата, што значи дека политичарите во земјите на потекло на мигрантите треба да спроведуваат „транспарентни, фер и далекусежни“ политики, а богатите земји да се воздржат од каква било форма на „економски колонијализам“ ги експлоатира природните ресурси на посиромашните земји.
„Прогоните, војните, атмосферските феномени и екстремната сиромаштија се меѓу највидливите причини за присилната миграција денес. Мигрантите бегаат од сиромаштија, страв или очај“, рече Папата и ги повика земјите да работат заедно за да ги елиминираат овие причини за миграција.
Папата истакна дека целта на меѓународната соработка треба да биде да се гарантира правото на луѓето да не мора да емигрираат. Тој директно не спомна ниту една земја.
„И додека работиме секој случај на миграција да биде слободна одлука, повикани сме да покажеме максимална почит кон достоинството на секој мигрант; тоа значи придружување и управување со миграциските бранови најдобро што можеме, градење мостови, а не ѕидови, проширување на каналите за сигурна и редовна миграција“, напиша Папата во пораката.
Пораката на папата е објавена во време кога САД се соочуваат со голем мигрантски бран на јужната граница.
Илјадници мигранти сакаат да ја преминат границата пред да стапи на сила новиот закон со кој ќе им забрани на оние кои доаѓаат илегално да бараат азил.
Програмата на N1 телевизија можете да ја следите ВО ЖИВО на овој линк како и преку апликации за Android|
