Секој кој сака да живее долго мора да се грижи за здравјето на своето срце, а иако тоа вклучува правилна исхрана и вежбање, новото истражување открива и како можеме дополнително да влијаеме на неговото здравје со помош на три суплементи. Студијата објавена во списанието на Американскиот колеџ за кардиологија, која анализирала 900 клинички студии и 27 видови микронутриенти, открива дека одредени додатоци имаат најголемо влијание врз здравјето на срцето, вклучувајќи ги: омега 3 масни киселини, фолна киселина и антиоксидантот Q10.
Според резултатите од истражувањето, омега 3 масните киселини, попознати како рибино масло, можат да го намалат ризикот од смрт како резултат на кардиоваскуларни болести, додека фолната киселина ќе ги намали шансите за мозочен удар. Антиоксидантот Q10 го намалува ризикот од смрт од кардиоваскуларни заболувања, пренесува Ordinacija.hr.
Токму овој проширен истражувачки пристап помогна да се утврди кои хранливи материи се особено важни за заштита на срцето, рече д-р Симин Лиу, професор по епидемиологија на Универзитетот Браун и главен автор на студијата. „Истражувањето за суплементите обично е ограничено на анализа на еден или два минерали и решивме да ги процениме сите достапни податоци и студии за микронутриенти, кои вклучуваат фитонутриенти и антиоксидантни додатоци и нивното влијание врз здравјето на срцето и бројните кардиоваскуларни болести“, вели тој.
Бета каротенот, природен пигмент, е докажано дека е додаток кој не му помага на здравјето на срцето, покажуваат истражувањата. Пигментот се претвора во витамин А во телото и може да го зголеми ризикот од срцеви заболувања поради токсичност. Исто така, може да предизвика гадење, губење на косата и проблеми со коските, според веб-страницата на Американското здружение за превенција. Истражувањето исто така наведува дека витаминот Ц, витаминот Д и витаминот Е немаат директна врска со долгорочното здравје на срцето.
