Лидерот на милитантната група Хамас фрлил стап преку главата во правец на дронот што му се приближил во последните мигови од неговиот живот, сугерира снимка од беспилотното летало која ја објави израелската војска, пишува „Гардијан“.
Сам во разурнат стан во Газа со ѕидовите издувани од гранатирање, Јахја Синвар е седнат стуткан на стол покриен со прашина, со главата и лицето завиени со шамија. Неговата десна рака изгледа тешко повредена.
Кога била направена снимката, портпаролот на израелската војска Даниел Хагари рече дека Синвар бил идентификуван само како борец кој се крие во зградата.
Војската потоа испукала дополнителна граната врз зградата, предизвикувајќи таа да се урне и да го убие, рече Хагари. Тој рече дека Синвар бил пронајден со панцир, гранати и со 40.000 шекели (околу 10.707 долари).
Според Хагари, Синвар сам побегнал во една од зградите.
Од друга страна, Хамас не го коментираше убиството на Синвар.
Како бил пронајден Синвар? Израелските власти тврдат дека го откриле пешадиски војници кои во средата пребарувале област во областа Тал Ел Султан во јужна Газа. Се сметало дека во областа се наоѓаат високи членови на Хамас.
Војниците виделе тројца осомничени милитанти како се движат меѓу зградите и отвориле оган, што довело до престрелка за време на која Синвар избегал во руинирана зграда.
Фотографиите кои кружат на интернет покажаа тело на човек кој наликува на Синвар со отворена рана на главата, облечен во елек во воен стил, половина затрупан во урнатините на уништената зграда.
Во последните месеци од својот живот, Синвар, главниот организатор на нападот на Израел на 7 октомври 2023 година, кој ја започна војната во Газа, се чини дека престанал да користи телефони и друга комуникациска опрема што би им овозможила на моќните израелски разузнавачки служби да го следат.
Израелските власти рекоа дека веруваат дека тој се криел во еден од огромната мрежа тунели што Хамас ги ископа под Газа, но дури и тунелите не биле гаранција за бегство од апсење.
Разузнавачките служби го бараа Синвар со месеци и постепено ја ограничуваа областа каде што тој може да дејствува, соопшти израелската војска.
Стоматолошките записи, отпечатоците од прсти и ДНК-тестирањето дадоа конечна потврда за смртта на Синвар.
