Нормално е да чувствувате огромна желба за помфрит или чипс од време на време. Но, ако се чини дека редовно копнеете за солена храна, вашето тело можеби се обидува да ви каже нешто.
Треба да бидете внимателни со внесувањето солена храна, бидејќи редовното консумирање на храна со висока содржина на сол може да има негативно влијание врз здравјето. Американската Администрација за храна и лекови препорачува внесувањето на натриум да биде помало од 2.300 милиграми дневно, што е околу една кафена лажичка сол. Редовното консумирање на големи количини го зголемува ризикот од висок крвен притисок, кој е главната причина за мозочен удар и срцеви заболувања.
Ако се прашувате од каде доаѓа желбата за сол, еве кои се можните виновници кои ги објави Индекс.
Неодамна сте на диета
Ако неодамна сте биле на диета, може да копнеете за сол бидејќи одеднаш таквата храна е „забранета“. „Истражувањата покажуваат дека имаме поголема желба за храна која се смета за лоша и чијшто внес се обидуваме да го ограничиме. Ако одите на диета, веројатно ќе почнете да копнеете за храна што не треба да ја јадете“, вели диететичарот Ерика Инграхам за The Parade. Затоа се советува да не се поставуваат строги правила, туку умерено да се јаде и солена и слатка храна.
Вежбате многу
Електролитниот дисбаланс што го осиромашува телото од натриум може да предизвика желба за сол. Според диететичарката Брижит Цајтлин, „губиме натриум преку потење, па телото ќе копнее за сол за да ја надомести разликата“. По тренингот, важно е да се заменат електролитите изгубени со интензивно вежбање.
Редовно јадете многу солена храна
И покрај тоа што лишувањето од солена храна може да доведе до желба за нив, интересно е што редовното јадење може да доведе и до поголема желба за нив. Ако сте навикнати на солена ужина секој ден во 16 часот, таа желба веројатно ќе се појави во тој период од денот.
Наскоро ќе добиете менструација
Да, желбите се реални во ПМС. Цајтлин објаснува: „За време и непосредно пред менструацијата, вашето тело поминува низ хормонални промени кои можат да придонесат за промени во нивото на натриум во крвта и да предизвикаат желба за повеќе сол“. Научните студии го потврдуваат ова, велејќи дека желбата за храна богата со шеќер, сол и масти е честа појава во предменструалната фаза.
Вие сте бремени
Исто како што хормоните можат да доведат до желба за одредена храна пред менструацијата, Инграхам вели дека истото може да се случи и за време на бременоста. „Една теорија е дека тоа може да се должи на хормонални промени или зголемување на волуменот на крвта“, вели таа.
Под стрес сте
Според диететичарите, друга причина за желбата за солена храна е високото ниво на стрес. Чувството на стрес го зголемува нивото на кортизол во мозокот. Високото ниво на кортизол му испраќа на телото порака дека е загрозено. Телото го толкува ова како потреба од повеќе гориво за да се бори против заканата, што доведува до желба за храна богата со сол, шеќер и масти.
Вие сте уморни
А недостатокот на сон може да предизвика желба за храна која не е толку здрава. Научните истражувања покажуваат дека недостатокот на сон создава стрес за телото, што го зголемува нивото на кортизол, а потоа се случува истото како во претходната точка.
