Функционерите коишто ќе се најдат на црните листи на САД за корупција, организиран криминал, злоупотреба на службената должност и хибридни закани, ќе се соочат со времено престанување на функцијата која ја извршуваат, ќе им се забрани да учествуваат на тендери до правосилноста на пресудата, а останува во игра и конфискацијата на нелегално стекнат имот.
Ова денеска го изјави министерот за надворешни работи Бујар Османи, претставувајќи ги измените на Законот за рестриктивни мерки, со кои врз лицата кои се најдоа на црните листи на САД ќе се применат рестриктивни мерки и во Македонија.
Владата за законските измени ќе расправа на следната седница во вторник, а ќе треба да се најдат пред пратениците во Собранието на РСМ една недела подоцна.
Со законските измени, обвинителството ќе мора да покрене постапка за лице кое се наоѓа на црнаите листи на САД, доколку тоа од него го побара владата.
Османи се надева дека ваквите законски измени ќе бидат усвоени брзо во Собранието од страна на пратениците, но и дека никој нема да си дозволи да го блокира законот, без разлика на тоа дали ќе има европско знаменце или не.
