Членовите на палестинското движење Хамас планираат да ослободат уште руски државјани во знак на благодарност до рускиот претседател Владимир Путин, изјави членот на Политбирото на палестинското движење, Муса Абу Марзук.
– Не ослободивме ниту еден Израелец кој е во Газа, освен Русинот Рон Кривој, кој го ослободивме во знак на благодарност на движењето за ставот на рускиот претседател Путин. Денеска ќе бидат ослободени уште неколку Руси, што е надвор од опсегот на договорот за примирје – напиша тој на социјалната мрежа Икс (поранешен Твитер).
Израелската телевизија Кан, повикувајќи се на висок член на Хамас, објави дека групата ќе ослободи двајца заложници со руско државјанство.
Ова не е првпат Хамас да прави исклучоци за руските граѓани, по ослободувањето на руско-израелскиот државјанин Рон Кривој, што Хамас го нарече чин на „почитување“ на позицијата на Москва.
„Тоа беше единствената светска сила која отворено соработуваше со групата за време на војната“ – истакнаа од Хамас.
Вкупно седум лица со руско државјанство се земени како заложници, соопшти израелската влада.
