Речиси сигурно е дека периодот од 2023 до 2027 година ќе биде најтоплиот петгодишен период досега, предупредија во средата Обединетите нации.
Глобалните температури наскоро ќе ја надминат амбициозната цел поставена со Парискиот климатски договор, со две третини шанси тоа да се случи во една од следните пет години, објави Светската метеоролошка организација на ОН.
Осумте најтопли години досега биле меѓу 2015 и 2022 година, но се предвидува дека температурите дополнително ќе се зголемат како што се забрзуваат климатските промени.
– Има 98 проценти веројатност дека барем една од следните пет години, и петгодишниот период во целина, ќе биде најтопол досега – се вели во соопштението на Светската метеоролошка организација, пренесе Франс 24.
Во Парискиот договор од 2015 година, земјите се согласија да го ограничат глобалното затоплување на „многу под“ два Целзиусови степени над просечните нивоа измерени помеѓу 1850 и 1900 година и 1,5 степени Целзиусови ако е можно.
Глобалната просечна температура во 2022 година била за 1,15 степени повисока од просечната измерена во 1850-1900 година.
Светската метеоролошка организација изјави дека постои голема веројатност годишните глобални температури да надминат 1,5 степени Целзиусови над прединдустриските нивоа во најмалку една од годините помеѓу 2023 и 2027 година, со опсег од 1,1 до 1,8 Целзиусови прогнози за секоја од тие пет години.
