Поранешниот пратеник во украинскиот парламент кој ја поддржа руската инвазија на Украина, Олех Царов е застрелан и се наоѓа во тешка состојба, пишува Украинска правда. Информацијата ја сподели и Владимир Рогов, рускиот функционер задолжен за окупираниот дел во областа Запорожје.
Рогов напиша дека „состојбата на Олех е многу сериозна“ и дека е „на интензивна нега“. Тој потврди дека Царов бил застрелан.
На социјалните мрежи се шири и видео, наводно направено во близина на куќата на Царов, каде што бил застрелан. Потоа веста за атентатот беше објавена и на официјалниот Телеграм канал на Царов.
„Информацијата за атентат врз Олех Царов ја потврди и неговото семејство. Тој бил застрелан со два истрела околу полноќ. Нема информации за сторителот, а безбедносните сили го истражуваат инцидентот. До доаѓањето на Брзата помош, Олех веќе паднал во несвест и изгубил поголемо количество крв. Засега нема информации за неговата здравствена состојба“ – стои во објавата на Телеграм.
Во мај годинава, Окружниот суд Шевченкиевски во Киев во отсуство го осуди Царов на 12 години затвор. Царов пристигна во Киевската област заедно со руската армија во март минатата година, а исто така ја повика локалната управа да го предаде градот на руските окупатори.
На својот канал на Телеграм, Царов неколкупати повикуваше да се променат државните граници на Украина, прекршувајќи го поредокот утврден со Уставот на Украина.
Извори за Ројтерс минатиот месец изјавија дека Русија планирала Царов да ја води марионетската влада во Киев по инвазијата.
Царов ја отфрли оваа можност по изјава за Фајненшл Тајмс, во пресрет на самата инвазија. Тој за медиумите изјави дека оваа идеја е „многу смешна“ затоа што тој води само велнес бизнис на Крим и „не е доволно важна личност“.
Царов претходно беше пратеник во украинскиот парламент, а потоа и претседател на парламентот на Новорусија, ентитет формиран откако проруските сепаратисти во источна Украина прогласија отцепување во 2014 година и почнаа да се борат против украинските сили.
