Израелски воени авиони извршија напади во Сирија, насочени кон голем број локации, вклучително и единици за противвоздушна одбрана, соопшти Сириската опсерваторија за човекови права. Набљудувачката група соопшти дека израелските напади биле насочени кон воени локации во сирискиот крајбрежен регион Тартус.
Една експлозија, според Дејли мејл, била снимена од сензори за земјотрес. Експлозијата, се додава, била толку голема што била означена како земјотрес со јачина од 3,0 степени според Рихтеровата скала.
Според истражувачот Ричард Кордар, експлозијата била откриена од станица оддалечена 820 километри во Исник во западна Турција. Тој додаде дека сигналот патувал околу „двојно побрзо“ од нормален земјотрес.
Тартус беше локација на една од двете руски воени бази во Сирија и се користеше како поморска база, како и складиште за муниција. Голема експлозија, како и секундарни експлозии, може да укажуваат на присуство на голема количина складирано оружје. Руското Министерство за надворешни работи претходно денеска соопшти дека евакуирало дел од својот дипломатски персонал од Сирија, една недела по падот на диктаторот на земјата Башар ал Асад.
Поморската воена база првпат беше основана од Советскиот Сојуз во Тартус во 1971 година. Путин наредил проширување на базата во 2017 година, откако Асад го изнајмил објектот бесплатно на 49 години во замена за помош за да остане на власт, пишува Вечерњи лист.
