Во саботата рано наутро избувна пожар во Севастопол на Крим. Според локалниот гувернер Михаил Развозаев, се запалил складиште за нафта, а според првичните информации, за пожарот е одговорен дрон.Пожарот зафатил површина од околу илјада квадратни метри. Во пожарот нема повредени, пренесува ТАСС.
Гувернерот Развозаев најави дека сите служби за безбедност и спасување се на терен. „Нема закана за цивилната инфраструктура“, додаде подоцна гувернерот од местото на настанот, потврдувајќи дека нема жртви или повредени. Властите ги повикаа луѓето да останат смирени.
На гаснење на пожарот работат најмалку 60 пожарникари и едно противпожарно возило. Видеата од пожарот брзо се проширија на социјалните мрежи, прикажувајќи густ црн чад кој се издигнува високо над фабриката и огромен оган го осветлува ноќното небо.
На почетокот на неделава градот беше цел на два беспилотни летала – едниот беше уништен од руските сили, додека другиот се самодетонираше во надворешното пристаниште, додека ниту еден објект во Севастопол не беше оштетен, пишува РТ.
Инаку, Севастопол се наоѓа на југозападниот брег на Крим и Русија го смета за свој град по анексијата на Крим во 2014 година, иако Украина и нејзиниот претседател Володимир Зеленски постојано најавуваа дека ќе ги ослободат сите окупирани територии, вклучувајќи го и Крим.
Севастопол е важен, стратешки пристанишен град за руската Црноморска флота и беше цел на напади со беспилотни летала во многу наврати откако Москва ја започна својата инвазија на Украина во февруари минатата година.
