Денеска според прогнозата на Управата за хидрометеоролошки работи, нè очекува студено утро, а преку денот сончево време, со мала до умерена локална облачност. Кон крајот на денот и во текот на ноќта облачноста ќе се зголемува. Ќе дува слаб до умерен ветер од јужен до југозападен правец.
Во Скопје утрото ќе биде ведро и студено, а денот претежно сончев. Кон крајот на денот и во текот на ноќта ќе биде облачно.
Минималната температура ќе се движи од минус 7 во Маврово, до 1 степен во Гевгелија, а максималната ќе биде од 1 степен во Маврово до 9 степени Целзиусови во Гевгелија.
Во Скопје утринската температура ќе се симне до минус 3 степени, а дневната ќе се искачи до 8.
Од понеделник, под влијание на циклонска активност и студен воздух од север, ќе започнат нови врнежи претежно од снег, а во делови од Повардарието од дожд.
Особено во западниот дел и на истокот, каде што во понеделник врнежите ќе бидат пообилни, ќе се зголеми и ќе се прошири и снежната покривка. Снег ќе има понекаде и во пониските места.
Температурите следната недела ќе бидат пониски, максималната ќе изнесува 7 степени.
