Спасувачите во градот Рафах, на југот на Газа, извлекоа бебе од урнатините по израелски воздушен напад, јавува Би-Би-Си.
Луѓето со раце ја ископале Маријам Абу Акел од под урнатините, пред спасувачот да истрча со неа во блиската болница каде докторите и ги саниреле повредите.,
Бебето било дома со своето семејство кога се случил нападот, при што биле убиени нејзината мајка и сестра, објави Ројтерс. Нејзиниот татко и помалиот брат преживеале.
– Во истиот воздушен напад загинаа 20 лица, а 55 се повредени – соопшти портпаролот на Министерството за здравство кое го води Хамас.
Повеќе од 21.500 луѓе – главно деца и жени – се убиени за време на одмаздничките напади на Израел врз Газа, според Министерството за здравство на Хамас, пренесува Би-Би-Си. Се верува дека уште илјадници се затрупани под урнатините на зградите уништени од воздушни и артилериски напади.
