Неколку руски медиуми објавија фотографии направени за време на полициската рација во куќата на шефот на паравоената формација Вагнер, Евгениј Пригожин која се наоѓа во луксузен кварт во Санкт Петербург. Рускиот портал Фонтанка пренесувајќи детали од рацијата објави и серија фотографии на кои е прикажана внатрешноста на луксузната куќа на Пригожин. На нив има многу необични работи – фотографија со отсечени глави како трофеј, многу оружје, пакети со куп пари во американски долари и руски рубљи, импровизирана болница и колекција од перики и лажни пасоши. Во една од собите, шефот на Вагнер имал поставен голем чекан со натпис „за важни преговори“.
Еден од најморбидните детали е фотографијата со отсечени глави што ја пронашле истражителите на ѕидот во една од собите.
На другите ѕидови има различни признанија и награди, меѓу кои и лента што Пригожин ја добил од гувернерот на Санкт Петербург, Александар Беглов, негов долгогодишен ривал.
Фонтанка пишува дека иследниците во куќата на Пригожин пронашле и импровизирана болница со многу медицинска опрема што за која се претпоставува дека останала од времето на пандемијата, но не е исклучено дека се користела и за итни интервенции.
Фотографии од претресот на куќата на Пригожин објавија и руски телевизиски куќи, а за нив детално се зборуваше во ток-шоуто на државниот канал Русија 1.
Во меѓувреме, неколку Телеграм канали поврзани со Кремљ објавија и наводни фотографии на шефот на Вагнер маскиран со брада и со перики.
ТВ Дожд објави дека претходниот ден ги добила истите фотографии од гледач кој тврдел дека е поранешен вработен во една од компаниите на Пригожин.
Во вилата биле пронајдени и лажни пасоши. На една од нив, покрај фотографијата на Пригожин, стои името Дмитриј Исакович.
Тоа е името на вистинска личност која живее во Санкт Петербург. Тој е по потекло од Естонија и работи како инструктор за возење, пишува порталот 24news.
Порталот контактирал со човекот кој им рекол дека не знае како Пригожин дошол до неговите информации.
Руските медиуми информираат и дека пред една недела руските власти на Пригожин му вратиле 10 милијарди рубљи. Тоа се пари кои биле запленети во полициските рации за време на минатомесечниот вооружен бунт на припадниците на Вагнер. Во Санкт Петербург полицијата запленила голема сума пари, како и пет златни прачки, при рација на имоти поврзани со Пригожин.
За потсетување, рускиот претседател Владимир Путин на крајот се согласи да ги отфрли обвиненијата, во замена за тоа шефот на платеници да се откаже од бунтот и да замине во соседна Белорусија. Според независниот руски медиум Фонтанка, полицијата ги пронашла парите и златото, проценети на „неколку тони“.
Готовината и златото му биле предадени на возачот на Пригожин, додека Пригожин присуствувал на тајниот состанок со Путин во Москва, во неделата. Пригожин изјави дека запленетата готовина била наменета за плати на неговите борци и да обезбеди материјална отштета за семејствата на загинатите платеници.
Во првите извештаи, полицијата запленила 4 милијарди рубљи од паркирано комбе, а потоа биле запленети уште 6 милијарди рубљи спакувани во 80 картонски кутии во друго комбе.
Albanian
English
Macedonian
Turkish
