Луѓето со нелекувано оштетување на видот се изложени на значителен ризик да развијат деменција, покажа новото истражување.
д-р. Џошуа Ерлих и неговите колеги ги анализираа податоците од студијата од 2021 година во која беа опфатени речиси 3.000 луѓе, пренесува Си-Ен-Ен. На испитаниците, на возраст над 71 година, им беа дадени таблет уреди со тестови за близок и далечен вид, како и чувствителност на контраст, а потоа беа подложени на тест за деменција.
Од сите испитаници, 12,3% покажале знаци на деменција. Кај лицата кои боледуваат од далекувидост, бројот скокнал на 19,5%, 21,5% кај кратковидите и дури 32,9% кај лицата со тешки оштетувања.
„Студијата покажа дека дури и благо оштетување на видот може да го зголеми ризикот“, вели д-р Ариел Силверман, директор на истражување во Американската фондација за слепи.
Корелација или нешто повеќе?
Важно е да се напомене дека поради начинот на кој е дизајнирана студијата, истражувачкиот тим не може со сигурност да знае дали оштетувањето на видот е причина за деменција, само дека тие се поврзани.
„Деменцијата може да предизвика губење на видот или двете состојби може да се појават истовремено“, рече Ерлих.
Постои слична корелација помеѓу губење на слухот и деменција. Можно е оштетувањата да го намалат придонесот на нашите сетила, што може да доведе до одредена конфузија што може да го забрза падот на когнитивните функции.
Следните чекори
Што треба да направите во врска со тоа? „Одржувајте грижа за видот. Покрај здрав живот, важни се годишните посети на лекар и очните тестови, а доколку се открие проблем, решете го“, заклучи Ерлих.
Кога станува збор за оштетување на видот, се проценува дека повеќе од 80% од случаите може да се решат. По прегледот, вашиот офталмолог може да препорача корективна процедура или едноставно да препорача диоптриски очила. Во случај на деменција, превентивните мерки се важни, а грижата за вашите сетила е лесен начин да се грижите за вашето когнитивно здравје.
