Новиот грузиски претседател, Михаил Кавелашвили, во своето прво обраќање по преземањето на функцијата, изјави дека Грузија ќе го продолжи својот пат кон пристапување во ЕУ.
– Ние се стремиме да станеме полноправна членка на ЕУ во 2030 година бидејќи тоа е цивилизиран избор на нашиот народ што е втемелен во нашиот Устав – нагласи Кавелашвили.
Кавелашвили рече дека до 2028 година Грузија ќе исполни повеќе од 90% од условите од Договорот за асоцијација, склучен со ЕУ во 2014 година. Тој ја потврди и подготвеноста на Тбилиси да преговара со Брисел за членството на земјата во ЕУ во секое време, доколку Унијата понуди таков предлог.
На 14 декември грузискиот парламент го избра Кавелашвили за нов претседател на земјата. Тој беше кандидат на владејачката партија Грузиски сон и доби 224 гласа од вкупно 300. Кавелашвили официјално ја презеде функцијата вчера.Опозицијата организираше протест во Тбилиси ден пред неговата инаугурација.
Михаил Кавелашвили е поранешен фудбалер на Манчестер Сити и се смета за сојузник на владејачката партија Грузиски сон.
Партијата е предводена од контроверзниот олигарх и поранешен премиер, Бидзина Иванишвили, најбогатиот човек во Грузија, кој има деловни врски во Русија. Во пресрет на парламентарните избори во земјата, на кои победи Грузиски сон, партијата водеше кампања во која ги потсетуваше гласачите на војната со Русија во 2008 година, користејќи слики од воено разурнатата Украина како тактика што предизвикува страв за да ги одврати луѓето да бараат поблиски врски со ЕУ.
Поради оваа причина, демонстрантите во Грузија можеа да се видат со знамиња и со симболи на ЕУ и на Украина, како и со националното знаме на Грузија.
