Талибанските медиуми престанаа да прикажуваат фотографии од живи суштества – луѓе и животни – во некои авганистански провинции, со цел да се придржуваат кон законите за морал, изјавија денеска претставници на локалните власти.
Во август, Министерството за промоција на доблест објави закони кои ги регулираат аспектите од секојдневниот живот како што се јавниот превоз, медиумите и прославите.
Член 17 забранува објавување слики од живи суштества, што според заговорниците за човекови права, предизвикува загриженост за последиците врз авганистанските медиуми и врз слободата на печатот.
Портпаролот на Министерството за промоција на доблест, Саиф ул Ислам Хајбер, рече дека на владините медиуми во провинциите Тахар, Мајдан Вардак и Кандахар им било препорачано да не емитуваат или прикажуваат фотографии „од што било со душа“, подразбирајќи луѓе и животни.
Хајбер рече дека министерството е одговорно за спроведување на законите за морал, но не прецизираше дали правилата се однесуваат на сите медиуми, вклучувајќи ги странските, или само на авганистанските канали и интернет страници, ниту, пак, како ќе се спроведуваат законите.
Ниедна друга земја со мнозинско муслиманско население не наметнува слични ограничувања, вклучувајќи ги Иран и Саудиска Арабија.
За време на претходното владеење на талибанците во доцните 1990-ти, целосно беа забранети повеќето телевизиски станици, радио-станици и весници.
