Денеска од 15 часот литар еуродизел на пумпите во Србија ќе чини 194 динари, а бензин Еуропремиум БМБ 174 динари, дознава „Блиц Бизнис“.
Затоа, споредено со цената на горивото од минатата недела, дизелот остана ист, а бензините поевтинуваат за еден динар, пренесува Блиц.
Цените на нафтата на светскиот пазар
Според податоците на берзата, цената на суровата нафта се искачи на 73.997 долари, а на нафтата од типот брент на 79.420 долари и во двата случаи за приближно два отсто.
На отворањето на берзата ТТФ европските фјучерси на гас се продаваа по цена од 31 евро за мегават-час.
Цените на нафтата се зголемија откако Велика Британија и САД започнаа воени напади насочени кон областите во Јемен контролирани од Хутите, додека тензиите во Црвеното Море продолжуваат да растат.
„Овие насочени напади испраќаат јасна порака дека САД и нашите партнери нема да толерираат напади врз нашиот персонал или да дозволат непријателски актери да ја загрозуваат слободата на навигација по една од најкритичните трговски рути во светот“, рече американскиот претседател Џо Бајден. Иако САД извршија напади против ирански посредници во Сирија и Ирак по избивањето на војната во Газа, ова ќе биде првиот познат напад против Хутите поддржани од Иран во Јемен.
