Во Русија е забележана нова сомнителна смрт. Полковникот Роман Малик, задолжен за регрутирање и испраќање регрути во Украина, беше пронајден како виси на ограда минатиот викенд.
Иако за Малик најпрво беше наведено дека срцевите проблеми се причина за смртта, полицијата не ја исклучи можноста за убиство или самоубиство, пишува британски Тајмс.
Откако рускиот претседател Владимир Путин нареди инвазија на Украина, евидентирана е серија сомнителни смртни случаи на богати Руси.
Така првиот човек на Путин за развој на арктичките ресурси на Русија, Иван Печорин, наводно паднал во морето додека пловел по брегот на Пацификот на земјата. Тој беше генерален директор на корпорацијата на Путин за развој на Далечниот Исток и Арктикот.
Сомнителна смрт на богати Руси
Да се потсетиме на други случаи на сомнителни смртни случаи.
Поранешниот службеник на Московскиот воздухопловен институт, Анатолиј Герашченко, наводно се лизнал и паднал по скалите во зградата на институтот и починал од повредите.
Главниот уредник на рускиот државен медиум Правда, Владимир Николаевич Сунгоркин наводно починал од срцев удар, а Дејли Мејл пишува дека Сунгоркин имал знаци на задушување.
Шефот на управата на Лукоил наводно паднал од прозорец
Претседателот на управниот одбор на рускиот производител на нафта Лукоил Равил Маганов почина на почетокот на септември при наводен пад од прозорецот на болницата во Москва. Маганов работи во нафтена компанија од 1993 година, а неговиот брат е шеф на друг руски производител на нафта, Татнефт.
Рускиот милионер Јуриј Воронов со врски со Гаспром беше пронајден мртов на почетокот на јули во базенот на неговата вила во луксузно предградие на Санкт Петербург. Неговото тело било пронајдено како лебди во базенот со прострелна рана во главата, додека чаури биле пронајдени на дното од базенот.
Поранешниот шеф на Лукоил пронајден мртов во куќата на шаман
Поранешниот извршен директор на Лукоил, Александар Суботин, беше пронајден мртов на 10 мај во домот на локален шаман во Митишчи, град североисточно од Москва. Покрената е истрага иако Суботин наводно доживеал срцев удар.
Владислав Аваев беше пронајден мртов со прострелна рана во неговиот стан во Москва на 18 април, заедно со сопругата и 13-годишната ќерка. Аваев беше поранешен потпретседател на Гаспромбанк. Инспекторите веруваат дека тој ги застрелал сопругата и ќерката пред да се самоубие.
Рускиот милијардер Василиј Мелников е пронајден мртов во својот стан во Нижни Новгород, објавија руските медиуми во март. Тој, неговата сопруга и двата сина на четири и десет години биле избодени до смрт.
Првиот човек на Гаспром пронајден мртов во гаража
Извршниот директор на Гаспром Александар Тјуљаков беше пронајден мртов на 25 февруари во гаража на стан во близина на Санкт Петербург. Полицијата соопшти дека до неговото тело пронашла белешка за самоубиство. Тјуљаков наводно бил жестоко претепан пред смртта, објавија некои руски медиуми, пишува Индекс.
Друг извршен директор на Гаспром, Леонид Шулман, беше пронајден мртов во својата куќа во јануари оваа година, еден месец пред почетокот на инвазијата. Во прошталната белешка пронајдена во близина на неговото тело, пишувало дека не сака да биде инвалид и товар за семејството.
