Андреј Сидоров, стручњак на руската државна телевизија, се закани дека Полска може да престане да постои.
Руски ТВ водители, пропагандисти и официјални лица постојано им се закануваа на членките на НАТО дека ја поддржуваат Украина во војната против Русија.
Сидоров, заменик-декан за светска политика на Московскиот државен универзитет, предупреди дека Полска „може да престане да постои“ доколку преземе чекор што се однесува и на рускиот сојузник Белорусија.
„На другарите од Полска треба јасно да им се стави до знаење дека ние ја сметаме Белорусија за наша безбедност. Ако направат потег, Полска би можела да престане да постои“, рече Сидоров, а пренесува Newsweek.
Заканата доаѓа веднаш откако белорускиот претседател Александар Лукашенко во петокот предупреди дека нуклеарното оружје ќе биде употребено против НАТО доколку ја нападне неговата нација или Русија. Белорусија нема сопствено нуклеарно оружје, но од минатата година ги држи руските тактички боеви глави на своја територија.
Лукашенко, верен сојузник на рускиот претседател Владимир Путин, го изјави ова додека зборуваше на настан со студенти во Минск, главниот град на Белорусија.
Тој предупреди дека нападот врз Белорусија ќе биде „Трета светска војна“ и потсети дека руската нуклеарна доктрина е променета и наведува дека нуклеарното оружје ќе се користи во случај на напад и на Русија и на Белорусија.
„Нападот на Белорусија би предизвикал Трета светска војна, а Путин го потврди тоа со промена на нуклеарната доктрина. Нападот врз Русија и Белорусија ќе предизвика нуклеарен одговор“, рече Лукашенко.
