Локацијата ви е добра, политичкиот систем ви е добар. Патиштата треба да ги поправите, но ако го направите тоа вашите можности се големи. Фабрики од Холандија, Белгија ако сакате да го преселат производството овде, најважна е инфраструктура за транспорт – порача нобеловецoт по економија Пол Кругман, за време на неговото излагање на Скопскиот економски финансиски форум, каде што беше почесен гостин.
Тој не очекува дека глобалната економија ќе падне во рецесија, но ќе има ниски стапки на економски раст. Високите стапки на инфлација, пак, смета дека ќе се задржат година до две, со значително намалување во следниот период.
Нобеловецот нагласи дека времето на евтини пари е зад нас. Тој посочи дека централните банки полека почнуваат да ги подигнуваат каматите и покрај тоа што нивните можности за интервенции во борба со инфлацијата стануваат прилично ограничени.
